Священный Синод утвердил текст службы священномученику Андрею Зимину

26 декабря 2025 года участники заседания Священного Синода заслушали рапорты председателя Издательского Совета Русской Православной Церкви митрополита Калужского и Боровского Климента и председателя Синодальной богослужебной комиссии митрополита Тверского и Кашинского Амвросия о представлении на утверждение Синода ряда богослужебных текстов и текстов акафистов ( журнал № 133).

Участники заседания постановили утвердить к общецерковному богослужебному употреблению представленные тексты службы священномученику Андрею Зимину.

Текст утвержденной службы священномученику Андрею Зимину.

Источник: https://patriarchia.ru/article/119024 

Приложение:

МЕСЯЦА ЯНВАРЯ В 5-Й ДЕНЬ

СВЯЩЕННОМУЧЕНИКА АНДРЕЯ ЗИМИНА, ПРЕСВИТЕРА

Аще изволит настоятель, поем службу во ин день.

Аще же поем ю 5-го ианнуария, зри устав в конце.

 

НА ВЕЛИЦЕЙ ВЕЧЕРНИ

На Господи, воззвах: стихиры предпра́зднства три.

И священному́ченика три, глас 1:

Избра́нный Бо́гом в Це́ркви служи́ти/ гоне́ния лю́таго не устраши́лся еси́,/ свяще́нников похвало́, о́тче Андре́е,/ и плене́ние претерпе́вый,/ жизнь ве́чную привременней предпоче́л еси́,/ те́мже открове́нием свы́ше утвержда́емь,/ страда́ние прия́л еси́ му́жески,/ све́тлостию ве́ры просия́в в земли́ Уссури́йстей// и к новому́чеником причте́н, досточу́дне.

Отве́ргнутися себе́ и взя́ти крест свой/ во времена́ испове́дничества сподо́бился еси́,/ во́инов покрови́телю, о́тче Андре́е,/ и сло́во Бо́жие, я́ко кре́пкое ору́жие взе́м,/ ве́рою несумненною стра́х сме́ртен препобеди́л еси́:/ те́мже пе́сньми почита́емый,/ в со́нме святы́х пребыва́еши// и моля́щимся тебе́ помога́еши, священномучениче.

Свята́го Ду́ха в служе́нии призыва́ти/ в ра́дости се́рдца возлюби́л еси́,/ моли́твенников соприча́стниче, о́тче Андре́е,/ и я́ко дерзнове́ние ко Го́споду стяжа́вый,/ па́стырства плоды́ умно́жил еси́,/ те́мже предста́тельствуя любо́вию о на́с,/ Тро́ице Единосу́щней ныне предстои́ши// и мо́лишися о душа́х на́ших.

Аще поем службу во ин день, стихиры священному́ченика, глас 8:

Це́ркве ве́рный служи́телю, о́тче Андре́е,/ кре́ст свяще́нства прия́л еси́,/ я́ко зна́мение любве́ ко Христу́, рекшему:/ а́ще кто́ Мне́ слу́жит, Мне́ да после́дствует;/ те́мже всего́ себе́ Спаси́телю в же́ртву принесы́й/ и Тому́ спосле́дствовавый да́же до Голго́фы,/ с при́сными твои́ми за и́мя Его́ пострада́л е́си,// му́ченичеством небе́снаго пребыва́ния сподобля́емь.

Града Благове́щенска па́стырю преди́вный,/ и кра́я Уссури́йскаго пропове́дниче,/ Влады́чнее ко ученико́м уразуме́в вопроша́ние:/ Мо́жете ли пи́ти ча́шу, ю́же Аз и́мам пи́ти/ и креще́нием, и́мже Аз креща́юся, крести́тися?/ ча́шу скорбе́й прия́л еси́, я́ко благоче́стия ревни́тель,/ и свы́ше извеще́н, досточу́дне,// Христо́вым стра́стем поревнова́л еси́ и сме́рти.

И́мя апосто́льское прие́мый, о́тче Андре́е,/ и по́двигом апо́столов подража́вый,/ уразуме́л еси́ обетова́ние Христа́ служи́телем Его́:/ Иде́же есмь Аз, ту и слуга́ Мой бу́дет;/ те́мже в послуша́нии Бо́гу до конца́ пребы́л еси́,/ и ны́не све́том невече́рним облиста́емь,/ со учени́ки Спа́совыми на Небесе́х во сла́ве предстоя́,// мо́лися Святе́й Тро́ице о душа́х на́ших.

Слава, священному́ченика, глас 2:

Со́нма новому́чеников прича́стниче,/ свяще́нников Уссури́йских похвало́,/ ча́дом своим отец попечи́тельный,/ сло́ва Бо́жия проповедник неле́ностный/ помо́щник скорбя́щим сострада́тельный,/ и страда́лец за ве́ру долготерпели́вый,/ адама́нте ве́ры, священному́чениче Андре́е,// моли́ Христа́ Бо́га непреста́нно о всех нас.

И ныне, предпра́зднства.

А́ще кроме́ предпра́зднства, Богоро́дичен, глас то́йже: Пре́йде сень зако́нная:

Вход. Прокимен дне.

Чтения три общая священному́ченику Российскому XX века единому.

На литии́ стихи́ры предпра́зднства со стихóвны у́трени или́ я́же екклесиáрх извóлит, и священному́ченика, глас 4:

Благоче́стия ревни́телю, о́тче Андре́е,/ хра́мов зда́телю и люде́й просвети́телю усе́рднейший,/ приими́ моле́ние на́ше/ и испроси́ у ми́лостиваго Бо́га/ заступле́ние бе́дствующим и гре́шным покая́ние,/ ча́дом Це́ркве до́брое воспита́ние,// и всем чту́щим тя ве́лию ми́лость.

Слава, глас 5:

О́браз жития́ безпоро́чнаго/ яви́л еси́ па́стве твое́й, о́тче Андре́е,/ де́лом и сло́вом спасе́ние бли́жних созида́я,/ хра́мы я́ко учи́лища благоче́стия в земли́ твое́й утвержда́я,/ науча́я па́ству твою гласу со́вести внима́ти/ и дела́ милосе́рдия твори́ти./ Те́мже мо́лимся, помози́ и нам, па́стырю до́брый,// по подо́бию Бо́жию возобрази́тися.

И ныне, предпра́зднства.

А́ще кроме́ предпра́зднства, Богоро́дичен, глас то́йже:

Егда́ умно́жися непра́вда го́рдых,/ и ца́рство Росси́йское сокруши́ся,/ тогда́ Ма́терь Бо́жия ико́ною Свое́ю Держа́вною яви́ся,/ и я́ко Взбра́нная Воево́да на брань с неви́димым враго́м/ ве́лий сонм новому́чеников и испове́дников воздви́же,/ те́мже к заступле́нию Ея́ ны́не прибега́ем/ и мо́лим сохрани́ти Оте́чество на́ше невреди́мо// от всех наве́т вра́жиих.

На стиховне стихиры предпра́зднства.

Слава: священному́ченика, глас 4: О па́стырю до́брый: (см. ниже).

И ныне, предпра́зднства.

А́ще кроме́ предпра́зднства, стихи́ры священному́ченика, глас 1.

Подобен: Небесных чинов:

Ча́да духо́вная учи́л еси́,/ священному́чениче Андре́е:/ А́ще что от недове́домых прии́дет на ны,/ боле́знь лю́тая или́ го́ресть неизбы́вная,/ потщи́мся избежа́ти паде́ния духо́внаго,// но вся превозмо́жем терпели́внейше.

Стих: Свяще́нницы Твои́ облеку́тся в пра́вду/ и преподо́бнии Твои́ возра́дуются.

Бра́тию твою́ свяще́нную побужда́л еси́,/ страда́льче Христо́в, о́тче Андре́е,/ ре́вность чад по Бо́зе моли́твою возгрева́ти,/ в крестоноше́нии неутоми́мы пастыри пребы́ти,/ о про́поведи и науче́нии прилежа́ти// и о́браз являти жития́ благочести́ваго.

Стих: Прииди́те ча́да, послу́шайте Мене́,/ стра́ху Госпо́дню научу́ вас.

Па́стырское попече́ние о лю́дех имея,/ священному́чениче Андре́е,/ к покая́нию их зва́л еси, глаго́ля:/ испра́вити житие́, о ча́да, потщи́мся,/ да милости Божия сподобимся// и Ца́рствие Небе́сное наследим.

Слава, глас 4:

О па́стырю до́брый дальневосто́чныя ве́си Черни́говки/ и всея́ земли́ Примо́рския моли́твенниче,/ иере́е Андре́е, доблий страда́льче,/ слу́жбы Бо́жия ревни́телю и преда́ний оте́ческих храни́телю./ Кто не почуди́тся дел твои́х многопло́дию?/ Кто ли не воспое́т твое́ к бли́жним милосе́рдие?/ И сла́вы твоея́ му́ченическия сия́нию кто не возра́дуется?/ Вои́стинну жил еси́ не себе́ ра́ди,/ но Христа́ в себе живуща име́л еси́,/ укрепля́юща, умудря́юща и содева́юща чудеса́,// Его́же приле́жно моли́ о душа́х на́ших.

И ныне, предпра́зднства.

А́ще кроме́ предпра́зднства, Богородичен, глас тойже: При́зри на молéния:

На благословении хлебов тропа́рь святаго дважды и тропарь предпра́зднства единожды. А́ще кроме́ предпра́зднства, тропа́рь священному́ченика дважды и Богородице Дево: единожды.

А́ще ли же несть бдения, тропарь священномученика единожды, глас 5:

Земли́ Дальневосто́чныя прозябе́ние/ и о лю́дех ея́ те́плый моли́твенниче,/ хра́мов Бо́жиих усе́рдный строи́телю/ и благоче́стия неле́ностный учи́телю,/ священному́чениче Андре́е,/ ве́рою воспева́ем труды́ и по́двиги твоя́,/ во дни гоне́ний и бра́ни сме́ртию за Христа́ увенча́нныя./ Ты же, Престо́лу Бо́жию предстоя́,/ приле́жно моли́ся Го́сподеви// спасти́ся душа́м на́шим.

Слава, и ныне, предпра́зднства.

А́ще кроме́ предпра́зднства, Слава, и ныне: Богорóдичен воскрéсен,

глас тóйже.

НА УТРЕНИ

На Бог Господь: тропарь предпра́зднства, дважды, Слава, священному́ченика, И ныне, предпра́зднства. А́ще кроме́ предпра́зднства, тропарь святаго дважды. Слава, и ныне: Богородичен воскресен, глас тойже.

По 1-м стихословии седален, глас 5:

Я́ко до́ждь на руно́, сни́де Госпо́дь на зе́млю,/ я́ко О́гнь Невеще́ственный, погрузися во Иорда́н,/ естество́ водно́е освяща́я и скверны попаляя,/ ты же, о́тче Андре́е, при мо́ри апо́стольски послужи́вый,/ в праздник Креще́ния Госпо́дня// крила́ми му́ченическими к Бо́гу возлете́л еси́.

Слава, и ныне, предпра́зднства.

А́ще кроме́ предпра́зднства, Богоро́дичен, глас то́йже:

Влады́чице на́шей Богоро́дице/ те́пле моли́тву вознесе́м,/ прося́ще в ве́ре и благоче́стии лю́ди ру́сския утверди́ти,/ вражду́ и междуусо́бныя бра́ни истреби́ти,/ я́ко мно́гажды земля наша/ заступле́нием Ея́ спасе́на бысть от враг./ Темже и ны́не ве́руем,/ я́ко Держа́вная на́ша Засту́пница/ умо́лит Сы́на Своего́ и Бо́га на́шего// Оте́честву на́шему дарова́ти мир.

По 2-м стихословии седален, глас 6:

Ча́да духо́вная учи́л е́си, о́тче Андре́е,/ при́тчу мы́тареву изъясня́я:/ ду́ши на́ша облече́м в покая́ние,/ вся́кое де́ло благо́е и ми́лостыню в та́йне да сотвори́м,/ да при́зрит Госпо́дь на смире́ние рабо́в Свои́х,// да оправдани внидем в жи́знь ве́чную.

Слава, и ныне, предпра́зднства.

А́ще кроме́ предпра́зднства, Богоро́дичен, глас то́йже:

Арха́нгельское сло́во прия́ла еси́,/ и Херуви́мский престо́л показа́лася еси́,/ и на объя́тиих Твои́х носи́ла еси́, Богоро́дице,// Наде́жду душ на́ших.

Величание:

Велича́ем тя,/  священному́чениче Андре́е,/ и чти́м честна́я страда́ния твоя́,/ я́же за Христа́ во утвержде́ние на Руси́ Правосла́вия// претерпе́л еси́. 

Псало́м избра́нный:

Бог нам Прибе́жище и Си́ла.

Го́споди, воздви́гни си́лу Твою́ и прииди́, во е́же спасти́ ны.

Глаго́лах о свиде́ниих Твои́х пред цари́ и не стыдя́хся.

Вси язы́цы обыдо́ша мя, и и́менем Госпо́дним противля́хся им.

Тебе́ ра́ди умерщвля́еми есмы весь день, вмени́хомся я́ко о́вцы заколе́ния.

Кре́пость моя́ и пе́ние мое́ Госпо́дь и бысть мне во спасе́ние.

Сла́ва, и ны́не:

По полиелеи седален, глас 4:

Луча́ми свиде́тельства осветил еси/ вся концы́ земли́ Русски́я/ да́же до преде́л ея Дальневосто́чных,/ в ни́хже потруди́лся еси́/ и пострада́ти за Христа́ сподо́бился еси́,// о́тче Андре́е, му́жеству тезоимени́те.

Слава, и ныне, предпра́зднства.

А́ще кроме́ предпра́зднства, Богоро́дичен, глас то́йже:

Христа́ роди́вши, Де́во Чи́стая,/ ра́дости всю вселе́нную испо́лнила еси́,/ те́мже согла́сно лику́ют Не́бо и земля́,/ сла́вяще Тя,// Богома́ти Всенепоро́чная.

Степенна, 1-й антифон 4-го гласа. Проки́мен, глас 4: Проидо́хом сквозе́ огнь и во́ду,// и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Всякое дыхание: Евангелие от Матфеа, зачало 36. 

По 50-м псалме, стихира, глас 6:

Града Благове́щенска церко́вная красото́,/ земли́ Примо́рския непоколеби́мая кре́посте,/ иере́ю Бо́жий Андре́е,/ а́ще и от враго́в ве́ры правосла́вныя зело́ му́чим был еси́,/ та́йное злоде́йство во тьме содева́ющих,/ но сия́ние по́двига твоего́ к пе́нию Це́рковь воздвиза́ет./ Те́мже велича́ем тя све́тло,/ Христу́ приобщи́вшася кро́вию// и со дерзнове́нием моля́щася о душа́х на́ших.

Каноны предпра́зднства и священному́ченика.

А́ще кроме́ предпра́зднства, канон Богорóдицы и святáго.

Канон священномученика, глас 5.

Песнь 1

Ирмос: Пои́м Спаси́телю всех,/ во́льным хоте́нием/ на Дре́ве пригвозди́вшемуся// и мир просвети́вшему.

Воспе́ти Андре́я, священному́ченика,/ в со́нме Небе́снем/ со страстоте́рпцы, во́ины же и па́стырьми,// Христе́, сподо́би ны.

Обле́кся в ри́зу свяще́нства/ кре́пким жела́нием,/ крест прия́л еси́, свы́ше уверя́емь:// сим победи́ши, Андре́е.

Све́тлую Благове́щенска добро́ту,/ па́стыря усе́рднейша,/ в преде́лех кра́я Примо́рскаго просия́вшую звезду́// почти́м, воспева́юще.

Богородичен: Град Твой, Богоро́дице,/ и́же на Аму́ре реце́, сохраня́й,/ иере́я Андре́я иму́щи моли́твенника,// во святы́х просия́вшаго.

Песнь 3

Ирмос: Несть свят, я́ко Госпо́дь,/ и несть пра́веден, я́ко Бог мой,/ вознесы́й рог наш// и дая́й кре́пость царе́м на́шим.

Тезоиме́нному апо́столу уподо́бився,/ и раче́ние о де́ле Христо́ве/ показа́вый, о́тче Андре́е, му́жески,// лику новому́чеников сопричтен был еси́.

Це́рковь возлюби́в Христо́ву/ и свет Правосла́вия узре́в, озаря́ющь концы́,/ воспламени́лся еси́ се́рдцем твои́м// в ве́ре укрепля́ти Оте́чество на́ше.

Бурю безбожия в земли́ Росси́йстей/ узре́в очи́ма духо́вныма, о́тче Андре́е,/ се́рдцем пла́менным и усты́ завеща́л еси́ лю́дем// храни́ти ве́рность Церкви Божией.

Богородичен: Цари́це Небесе́ и земли́ возопии́м, ве́рнии:/ сердца́ на́ша очи́сти/ и ходи́ти настави// в за́поведех Сы́на Твоего́.

Кондак и икос предпразднства.

Седален, глас 5:

Трудолю́бное твое́ служе́ние му́дрым и просты́м,/ соше́дшеся в па́мять твою́, воспева́ем,/ бога́тству души́ твоея́ дивя́щеся,/ по́двигу же и страда́нию пе́ние принося́ще,/ священному́чениче сла́вный Андре́е./ Тем тя молим:/ помози́ нам уче́ний твои́х насле́дником бы́ти// и доброде́телем твои́м подража́ти усе́рдно.

Слава, и ныне, предпразднства.

А́ще кроме́ предпра́зднства, Богоро́дичен:

От Де́вы возсия́вый ми́ру, Христе́ Бо́же,// сы́ны Све́та То́ю показа́вый, поми́луй нас.

Песнь 4

Ирмос: Услы́шах слух си́лы Креста́,/ я́ко рай отве́рзеся им, и возопи́х:// сла́ва си́ле Твое́й, Го́споди.

Уве́дев ве́си Черни́говки добро́ту,/ и ве́ру умно́жити в ней возжеле́в, воззва́л еси́:// кре́пость пода́ждь мне, Го́споди.

Собра́л еси́ лю́ди под се́нию Креста́ и ико́н,/ и во оби́тель Святы́я Тро́ицы во Шма́ковке* ше́ствовати сия́ наста́вил еси́, пою́щия:// спаси́ на́с, Го́споди.

Позна́в ско́рбь, гряду́щую на страну́ Росси́йскую,/ не премени́л еси́ се́рдца твоего́, Христу́ моля́ся:// с Тобо́ю жив бу́ду во ве́ки, Го́споди.

Богородичен: Услы́шавше, я́ко Тобо́ю рай отве́рзеся им,/ воздви́гоша лю́дие в Черни́говке Рождеству Твоему храм,// да непрестанно Тя пою́т, Всепетая.

Песнь 5

Ирмос: Пра́вде научи́теся, живу́щии на земли́,/ и ум очи́стим, воздви́женным се́рдцем/ к ще́дрому Бо́гу// от но́щи у́тренююще.

Ве́ру изъясни́л еси́ лю́дем апо́стольски, глаго́ля:/ в покая́нии смире́ние стяжи́м,/ да очищенным по́мыслом Христу́ присту́пим,// сердца́ иму́ще любо́вию  испо́лнена.

Сло́вом упа́сл еси́, о́тче, ча́да церко́вная/ и от собла́знов лю́тых огради́л еси́ я,/ душе́ю ще́дрою творя́ ми́лостыни мно́ги,// яко Христов светильник горящий.

Ду́хом обнови́теся, па́стырие Церкве́,/ и по́мыслы освяти́те,/ в Преда́нии стояще бо́дренно,// – учи́л еси́, о́тче, собра́тию твою увещава́я.

Богородичен: Покро́ва Де́вы сподо́битеся, лю́дие,/ за́поведи храня́ще,/ возносит бо о нас моле́ние к Бо́жией Ма́тери// священному́ченик Андре́й доброхва́льный. 

Песнь 6

Ирмос: Во глубины́ отве́ргся морски́я,/ от нужд мои́х изба́ви мя,/ я́коже от ки́та возве́л еси́ проро́ка Ио́ну,/ та́ко и мене́, молю́ся,// предварив, спаси́ от жите́йских зол.

Над земле́ю Росси́йскою воздви́жеся/ бу́ря мяте́жная вели́ких зол/ бранию братоуби́йственною и ве́ры поруга́нием,/ ты же, па́стырю до́брый Андре́е,// себе́ и бли́жних угото́вал еси́ на верность Христу.

Во стремни́ны впадше грехо́вныя,/ лю́дие на богопротивление и братоуби́йство устреми́шася,/ ты же, о́тче Андре́е, возде́л еси́ ру́це твои́ свяще́ннии,/ об Оте́честве пла́ча и Бо́га умоля́я// Це́рковь утвердити в час гряду́щих зол.

Ве́рен пребы́в словесе́м Христо́вым,/ не малоду́шествовав, но отве́ргнув себе́,/ поте́кл еси́ путь стра́дания кре́стнаго,/ егда́ плене́н бысть мучи́тели, в де́брех тая́щимися// до вре́мени вла́сти безбо́жныя[1].

Богородичен: Ко о́бразу припаде́м Пречи́стыя,/ Я́же ве́рным покро́в и си́рым прибе́жище,/ де́вам отра́да и ма́терем утеше́ние,/ му́чеником похвала и пастырем по́мощь,// вся печа́ли утоля́ющая ско́рбных серде́ц.

Кондак, глас 6:

Уссури́йския па́ствы до́брый наста́вниче,/ священному́чениче Андре́е,/ первозва́нному апо́столу в креще́нии соиме́нный,/ тве́рдей ве́ре того́ подра́жал еси́/ и, селе́ния окре́стная обходя́,/ жи́зни во Христе́ лю́ди науча́л еси́,/ в годи́ну же страда́ний земли́ Русски́я,/ благода́тию Госпо́днею укрепля́емь,/ терпе́ние мук па́че ума́ явил еси́,/ ны́не же, на Небесе́х с новому́ченики Бо́гу предстоя́,// моли́ спасти́ся душа́м на́шим.

Икос:

Пла́меннаго ревни́теля правосла́вныя ве́ры, священному́ченика Андре́я почти́м,/ в день па́мяти его́ во храм Бо́жий соше́дшеся,/ и житие́, и страда́ние его́ воспомяну́вше,/ похва́льное тому́ пе́ние си́це возопии́м:/ Ра́дуйся, земли́ Дальневосто́чныя украше́ние;/ ра́дуйся, кра́я Примо́рскаго утвержде́ние./ Ра́дуйся, хра́мов Бо́жиих строи́телю;/ ра́дуйся, чад церко́вных воспита́телю./ Ра́дуйся, сло́вом и де́лом лю́ди наста́вивый;/ ра́дуйся, трудо́м и моли́твою Христу́ послужи́вый./ Ра́дуйся, святы́х уго́дников на Небеси сожи́телю;/ ра́дуйся, но́вых му́чеников Церкве Русския соприча́стниче.// Ра́дуйся, о́тче Андре́е, моли́твениче о душах на́ших.

Песнь 7

Ирмос: Благослове́н еси́, Бо́же,/ ви́дяй бе́здны/ и на Престо́ле Сла́вы седя́й,/ препе́тый и пресла́вный.

Претерпе́л еси́, о́тче Андрее́,/ плене́ния страда́ние,/ оба́че, свобожде́ние улучи́в, па́ству не оставил еси́,// яко служи́тель ве́рный и небоя́зненный.

Узре́в, иере́ю благода́тный,/ виде́ние сме́рти,/ му́ченичества бе́гати не восхоте́л еси́,// ве́рность и любо́вь ко Христу́ являя.

С верою в жизнь вечную/ сре́тил еси́ сме́рть, па́стырю до́брый,/ со сро́дники твои́ми// и вкупе с ними ко Господу возшел еси.

Богородичен: Осени́ла еси́ благослове́нием, Де́во,/ до́мы па́стырей и люде́й правосла́вных,/ от нихже мно́зи ча́ши му́ченическия приобщи́шася.

Песнь 8

Ирмос: Оте́ческое веле́ние му́дрствующе ю́ноши три в Вавило́не,/ безбо́жному веле́нию благоче́стно не покаря́ющеся,/ посреде́ осужде́ния о́гненнаго стоя́ще, вопия́ху:// благослови́те, вся дела́ Госпо́дня, Го́спода.

Бо́жие сло́во пропове́дающе,/ свяще́нницы Це́ркве Ру́сския,/ вра́жия ненавиде́ния му́жески не устраши́шася,/ бо́дренно ча́да духо́вныя наставляюще:// в терпе́нии и ве́рности вся возмога́йте о Го́споде.

Па́стыря и супру́жницы его́ с ма́терию убие́ние/ и дще́рей муче́ние ве́лие слы́шаще/ сын плотский и ча́да духо́вная ужасо́шася и возопи́ша Христу́:// Ка́ко воспла́чем, погребе́м и воспое́м страдальцы Твоя́, Го́споди?

Ца́рственных страстоте́рпцев помина́юще/ и новому́чеников мно́жество,/ в годи́ну гоне́ний до сме́рти пострада́вших,/ яко засту́пники на́ша ублажи́м, Христа́ моля́ще:// те́ми зе́млю на́шу в Правосла́вии сохрани́, Го́споди.

Богородичен: Пресвяте́й Влады́чице Богоро́дице возопии́м си́це:/ не преста́й хода́тайствовати пред Сы́ном Твои́м о Оте́честве на́шем,/ утоли́ на́ша печа́ли,/ да ти́хое житие́ поживе́м// и ра́дость обря́щем о воскре́сшем Го́споде.

Песнь 9

Ирмос: Жезл, прозя́бший от ко́рене Дави́дова, Богоро́дице Всепе́тая,/ Цвет красне́йший нам возсия́ла еси́,/ дре́вняго вино́вный блаже́нства.// Тем Тя вси пе́сньми велича́ем.

Поко́й моли́твенный в хра́ме Бо́жии, о́тче Андре́е, возлюби́вый,/ до́му Госпо́дню примета́тися изво́лил еси́/ и близ олтаря́ его́ упоко́ился еси́.// Темже тя вси с моли́твою велича́ем.

По́мощь подава́я с высоты́ Небе́сныя, па́стырю наш до́брый,/ о́ком све́тлым ста́до твое́ назира́еши/ и благода́тию мученичества твоего нас осеняеши.// Темже тя пе́сньми побе́дными прославля́ем.

Ра́дость дарова́вый нам в па́мяти твое́й, священному́чениче Андре́е,/ добропобе́дный во́ине и засту́пниче всенаде́жный,/ в ско́рбех и ну́ждах нас не остави,// да тя в моли́твах непрестанно воспева́ем.

Богородичен: Зе́млю Дальневосто́чную, Руси́ Святыя край Примо́рский,/ в ве́ре Правосла́вней всегда́ сохраня́й, Ма́ти Чи́стая,/ да и в радостех, и в печалех// Тя вси лю́дие Росси́йстии согла́сно ублажа́ем.

Светилен священномученика:

Во мгле жития́ на́шего плавающе, свети́льника земли́ Примо́рския имамы, Андре́я страда́льца свяще́ннаго, ко приста́нищу Небе́сному путь указу́ющаго нам.

Слава, и ныне, предпразднства.

А́ще кроме́ предпра́зднства, Богоро́дичен:

Досто́йно Тя сла́вят Си́лы Небе́сныя, и мы, недосто́йнии, дерза́ем воспе́ти Тя на земли, любо́вию бо Твое́ю, Ма́ти Све́та, николи́же оставля́еши нас.

На хвалитех стихиры предпразднства 4 и священномученика 4, глас 3:

Хра́мы Бо́жия в земли́ на́шей устро́ивый,/ храм явился еси живущаго в тебе Святаго Духа,/ труды́ ко трудо́м и моли́твы к моли́твам прилага́я,/ от си́лы в си́лу возше́л еси́,/ и муче́ния вене́ц све́тел восприи́м благода́тию,/ яже яви́ся от Бо́га, в Тро́ице воспева́емаго,// подаю́щаго нам тобою ве́лию ми́лость.

О́троком науче́ние на всяк день подава́я,/ и бо́дрствовати и трезви́тися па́ству сво́ю призыва́я,/ тружда́ющимся же и скорбьми́ обремене́нным помога́я,/ Андре́е священному́чениче, ду́ши мно́ги ко Христу́ привел еси,/ Ему́же ны́не спребыва́я, с ра́достию глаго́леши:// Се аз и де́ти, я́же ми дал еси, Го́споди.

Си́лен де́лом и сло́вом яви́лся еси́,/ сострада́телен же и мужествене́н и кро́ток лю́дем позна́лся еси́./ Те́мже мо́лим тя, Андре́е священне:/ доброде́телем твои́м нас научи́,/ муче́нием же твоим стоя́ти за ве́ру укрепи́,// да ча́да твоя́ яви́мся вои́стинну и ученицы́ досто́йнии.

А́ще кроме́ предпра́зднства, точию стихи́ры свята́го на 4.

Слава, глас 7:

Испыта́ния кре́пки лю́бящим Го́спода/ и благоче́стно жи́ти хотя́щим ско́рби мно́ги суть:/ Ца́рство бо Его́ несть от ми́ра сего́,/ и не на земли́, но на Небесе́х воздая́ние./ Сие́ от ю́ности уясни́в, о́тче Андре́е,/ ризою доброде́телей укра́сил еси́ себе́,/ пленение же и поругание и укоризны от беззаконных претерпев,/ кончину мученическую мужески приял еси,// я́ко вене́ц любве́ ко Христу́ Воскре́сшему.

И ныне, предпразднства.

А́ще кроме́ предпра́зднства, Богоро́дичен, глас то́йже:

Умири́ моли́твами Богоро́дицы жи́знь на́шу,/ вопию́щих Ти:// Ми́лостиве Го́споди, сла́ва Тебе́.

Славословие великое. Тропарь священномученика. Слава, и ныне, предпразднства. А́ще кроме́ предпра́зднства, Слава, и ныне, Богоро́дичен воскресен.

А́ще же вели́каго славослóвия несть, на стихо́вне стихи́ры предпра́зднства.

Сла́ва: священномученика, глас 8:

Це́ркве ве́рный служи́телю, о́тче Андре́е,/ кре́ст свяще́нства прия́л еси́,/ я́ко зна́мение любве́ ко Христу́, рекшему:/ е́же а́ще кто́ Мне́ слу́жит, Мне́ да после́дствует;/ те́мже Спаси́телю всего́ себе́ в же́ртву принесы́й/ и Тому́ спосле́дствовавый да́же до Голго́фы,/ с при́сными твои́ми за и́мя Его́ пострада́л е́си,// му́ченичеством небе́снаго пребыва́ния сподобля́емь.

И ны́не, предпра́зднства.

В концé утрени тропáрь святáго, Слáва, и ныне: предпрáзднства.

 

НА ЛИТУРГИИ

Блаженны от канона предпразднства песнь 3-я на 4 и священномученика песнь 6-я на 4. Аще кроме предпразднства, блаженна от кано́на святаго, пе́сни 3-я и 6-я, на 8. Прокимен, глас 7: Честна́ пред Го́сподем/ смерть препод́обных Его́. Стих: Что возда́м Го́сподеви о всех, я́же воздаде́ ми? Апостол к Римляном, зач. 99. Аллилуия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Стих: Бог нам Прибе́жище и си́ла, помо́щник в ско́рбех, обре́тших ны зело́. Евангелие от Луки, зач. 106. Конец: В терпе́нии ва́шем стяжи́те ду́ши ва́ша. Причастен: В па́мять ве́чную бу́дет пра́ведник:

Молитва

О па́стырю до́брый и страда́льче терпели́вый, священному́чениче сла́вный Андре́е, кра́я Примо́рскаго благове́стниче, ве́ры правыя храни́телю и о ча́дех Це́ркве Бо́жия до́брый попечи́телю! Ты учил еси несмущенным духом терпеливно нести крест бед и боле́зней, к покая́нию и свя́тости усе́рдно звал еси́. Преда́ние Це́ркве, я́ко зе́ницу о́ка, соблюда́ти завеща́л еси, в моли́твах бо́дрствовати ве́рным запове́дая и в ну́ждах многоразли́чных посо́бствовал еси́ труждающи́мся на земли́. И ны́не помози́ во испыта́ниих сущим не отступа́ти от Христа́, па́стырем на́шим служе́ние прилежне соверша́ти, все́м же лю́дем правосла́вным благоче́стно путе́м спасе́ния ше́ствовати, да моли́твами твои́ми жи́знь ве́чную насле́дуем и на Небесе́х с тобо́ю прославляти сподобимся Тро́ицу Единосу́щную во ве́ки веко́в. Ами́нь.

 

УСТАВНЫЕ УКАЗАНИЯ

Служба священномученика Андрея Зимина может быть спета как в день его памяти, 5 января, так и в иной день.

Поскольку 5 января декабря — это навечерие праздника Крещения Господня, в этот день служба может быть исполнена только по образцу вседневной: см. устав соединения последований предпразднства Богоявления, святых мучеников Феопемпта и Феоны и преподобной Синклитикии (одно из этих двух последований можно прибавить к службе священномученика, либо опустить их оба). В этом случае служба священномученика не имеет Божественной литургии и завершается утреней без пения великого славословия. Днем в навечерие будут, как обычно, совершаться Царские часы и великая вечерня с литургией по чину святителя Василия Великого, с великим освящением воды в конце.

Исключения составляют случаи совпадения 5 января с субботой и неделей пред Богоявлением, особенно в тех храмах, где память священномученика Андрея имеет особое почитание. В этих случаях, согласно уставу, Царские часы переносятся на предшествующую пятницу, а богослужение 5 января может совершаться в соединении со службой священномученику с полиелеем или бдением. По окончании Божественной литургии по чину свт. Иоанна Златоуста будут совершаться великая вечерня, целиком посвященная Богоявлению, и великое освящение воды.

В иных случаях, с благословения настоятеля храма или монастыря и при его желании спеть службу священномученику Андрея по уставу бдения или полиелея, его память может быть перенесена на 4 января или на иной подходящий день.

Ниже приведен устав службы священномученику Андрею 5 января, если эта память является храмовым праздником и приходится на субботу или неделю пред Богоявлением.

ЗРИ: Аще храм священномученика Андрея случится в субботу пред Богоявлением.

В пяток на малей вечерни, на Господи воззвах: стихиры храма на 4. Слава, храма: И ныне, предпразднства. На стиховне стихиры храма со стиховны великия вечерни, с припевы их. Слава, храма: И ныне, предпразднства.

По Трисвятом тропарь храма. Слава, и ныне, предпразднства.

На велицей вечерни: на Господи воззвах: стихиры на 8: предпразднства 3, и храма  5. Слава,  храма: И  ныне, предпразднства. Вход. Прокимен дне. Чтение храма. На литии стихиры храма: Слава, храма: И ныне, предпразднства. На литии стихиры предпразднства, со стиховны, и храма. На стиховне стихиры предпразднства, Слава, храма: И ныне, предпразднства. На благословение хлебов, тропарь храма дважды и предпразднства единожды.

На утрени, на Бог Господь, тропарь предпразднства дважды. Слава, храма: И ныне, предпразднства. По кафизмах седальны храма. Слава, и ныне, предпразднства: И чтение. Полиелей, величание, и седален храма по полиелеи. Слава, и ныне, предпразднства, или Богородичен: И чтение. Степенна 1-й антифон 4-го гласа. Прокимен, глас 4: Проидо́хом сквозе́ огнь и во́ду,/ и изве́л еси́ ны в поко́й. Стих: Разже́гл ны еси́, я́коже разжиза́ется сребро́. Вся́кое дыха́ние: Евангелие от Матфея, зачало 36. Стихира храма. Канон предпразднства, со ирмосом на 6, глас 2, ирмос по дважды. И храма на 8. Катавасиа: Глубины открыл есть дно: По 3-й песни, кондак и икос предпразднства, седален храма, дважды. Слава, и ныне, предпразднства. И чтение храма. По 6-й песни, кондак и икос храма. По 9-й песни, светилен предпразднства. Слава, храма. И ныне, предпразднства. На хвалитех стихиры на 8: предпразднства 4: и храма на 4, с припевы их. 1-й: Свяще́нницы Твои́ облеку́тся в пра́вду/ и преподо́бнии Твои́ возра́дуются. 2-й: Приидите чада, послушайте мене/ и страху Господню научу вас. Слава, храма: И ныне, предпразднства. Славословие великое. По трисвятом, тропарь храма: Слава, и ныне, предпразднства.

На часех, тропарь предпразднства, и храма. По трисвятом кондак предпразднства, и храма глаголем пременяюще.

На Литургии, блаженна от канона предпразднства песнь 3-я на 4 и храма песнь 6-я на 4. По входе тропарь предпразднства и храма. Слава, кондак храма: И ныне, предпразднства. Прокимен храма. Апостол Субботы пред Богоявлением (1 Тим., зач. 284) и храма (Рим. зач. 99). Аллилуиа храма. Евангелие Субботы пред Рождеством Христовым (Лк., зач. 72), и храма (Мф., зач. 5). Причастен храма.

ЗРИ: Аще ли случится храм священномученика Андрея в неделю пред Богоявлением в предпразднство, ианнуариа в 5-й день.

В субботу на малей вечерни: стихиры воскресны  4. Слава, храма: И ныне, предпразднства. На стиховне стихира воскресна и храма со стиховны великия вечерни, с припевы. Слава, храма: И ныне, предпразднства.

По Трисвятом тропарь воскресен. Слава, храма: И ныне, предпразднства. Ектения малая. И отпуст.

На велицей вечерни, на Го́споди, воззва́х: стихиры на 10: воскресны на 3, предпразднства на 3, и храма на 4: Слава, храма. И ныне, предпразднства. Вход. Прокимен дня. Чтение храма. На литии предпразднства, и храма: Слава, храма: И ныне, предпразднства. На стиховне стихиры воскресны. Слава, храма: И ныне, предпразднства. На благословение хлебов, Богородице Дево: дважды и храма единожды: и чтение.

На Утрени, на Бог Госпо́дь: тропарь воскресен, дважды. Слава, храма: И ныне, предпразднства. По кафисмах седальны воскресны и чтение. Полиелей, ипакои гласа. И седальны храма по 1-м стихословии, по 2-м стихословии, Слава: по полиелеи, И ныне: предпразднства. И чтение храма. Степенна гласа. Прокимен, и Евангелие храма. Воскресение Христово: и стихира храма. Канон воскресен, со ирмосом на 4: и предпразднства на 4: и храма на 6. Катавасия: Глубины открыл: По 3-й песни, кондак и икос воскресны, кондак и икос предпразднства, седален храма: Слава, и ныне,  предпразднства, и чтение храма. По 6-й песни, кондак и икос храма. На 9-й песни, поем Честнейшую: По 9-й песни, Ексапостиларий воскресен, Слава, храма: И ныне, предпразднства. На хвалитех стихиры воскресны, на 3: и храма, на 2: и предпразднства, на 3: с припевы их. Слава, храма: И ныне, Преблагословенна еси: Славословие великое, и прочее утрени.

На часех, тропарь воскресен, тропари предпраздства и храма пременяюще, кондаки: воскресен, предпразднства и храма пременяюще.

На Литургии, блаженна гласа на 4, от канона предпрзднства, песнь 3-я на 4: и храма, песнь 6-я на 4. По входе тропарь воскресен, предпразднства и храма. Кондаки: воскресен: Слава, храма: И ныне, предпразднства. Прокимен воскресен гласа и храма. Апостол Недели пред Богоявлением (Тим., зач. 298), и храма (Рим., зач. 99). Аллилуия, воскресен гласа и храма, глас 2: Свяще́нницы Твои́ облеку́тся в пра́вду и преподо́бнии Твои́ возра́дуются. Евангелие Недели пред Богоявлением (Мк., зач. 1), и храма (Лк., 106). Причастен воскресен: Хвали́те Го́спода с небе́с: и храма: В пáмять вéчную:

ЗРИ: По скончании литургии, аще творим память священномученика Андреа 5 ианнуариа в субботу или в неделю, в трапезу не ходим, но в притворе церковнем седшим нам, трапезарь дает по уломку хлеба коемуждо: или по малу хлебу пшеничному, и мало смоквий и финик, и по единой чаше вина, яко да не наречется пост: ожидаем же вечерняго собора. Посем отшедше в келлии своя, безмолвствуем до времене вечерняго. Великаго же Василия Литургия совершается в самый праздник.

При часе же вечернем дне: Знаменует в великое, и потом во вся тяжкая, и собравшимся нам во храм: И благословившу иерею, поем вечерню по обычаю: псалом, Благослови душе моя Господа: И аще в субботу вечера, поем, Блажен муж: кафисму всю. Аще ли в неделю вечера, поем 1-й антифон. На Господи воззвах: поем стихиры праздника на 8, глас 2: Просветителя нашего: Слава, и ныне, глас тойже: Приклонил еси главу Предтечи: Таже вход со Евангелием. Свете тихий: Прокимен дне: и чтения по чину их с тропари и со стихи и Трисвятое же не поем, занеже не совершается Божественная литургиа. По чтении же паремий, ектениа малая: и по возгласе, Прокимен, Апостол, и Евангелие, яко предписася. Ектениа, Рцем вси: И Сподоби Господи: И Исполним вечернюю молитву: иерей возглас. И исходим ко крестильнице, идеже уготован стол. И действует настоятель, или иерей по чину, якоже указася прежде, Поюще тропари: Глас господень на водах: И прочее бывает воследование освящения воды, неизменно. По кроплении же освященныя воды входим во храм, и поем стихиру: Слава, и ныне, глас 6: Воспоим вернии: и отпуст. Потом тропарь праздника. Слава, и ныне, кондак: Явился еси днесь: И пивше священную воду, входим в трапезу, и ядим совершенно, с древяномаслием, и пием вино.

ЗРИ: Аще ли же случится храм священномученика Андрéя кроме́ субботы и недели, поется служба храма во ин день.